وصفة أوزي الدجاج

   
لسلق الدجاج : 
نغمر الدجاجة المقطعة بالماء وبس تبدا تطلع الرغوة او الدهن بشيلو بملعقة
بعدين بضيف بصلة مقطعة مكعبات كبيرة /حبة لومي ٥ حبات ورق غار /٥ حبات هيل /عود قرفة /٣ حبات قرنفل وبغطي الطنجرة مدة ساعه الا ربع لحتى يستوي على نار متوسطة
بصفي الدجاج بس يستوي وبحتفظ بماء السلق للارز .
للارز : 
بضيف زيت نباتي تقريبا ٣ ملاعق كبيرة بعدين بضيف التالي كوبين ارز مندي مغسول ومنقوع مسبقا لمدة نصف ساعة/٣ اكواب مرق سلق الدجاج مصفى /فلفل اسود حسب الرغبة/نص م.ص قرفة مطحونة/١ م.ك بهارات مشكلة ناعمة /ملح حسب الرغبة /مكعب ماجي وبغطي وبخلي جزء من الغطا مفتوح حتى ما يفور ع نار عالية بالبداية
بعدين حيبلش يغلي ..وبعدين بس تبلش المي تنشف بوطي النار ع الاخر وبغطي بدون ما اخلي جزء مفتوح
وبس تنشف تماما بحط تحتو هداي مدة نص ساعه بستوي ع مهلو وبتفلفل صح
وبس يستوي بجيب حبة فحم مجمرة يعني بكون مجمرتها ع النار بالبداية بحطها بقصدير وبحطها داخل الطنجرة وبحط عليها زيت نباتي
بس تبلش الدخنة تطلع سكري الغطاي بسرعة ع الرز وشمي الريحة اللي بتطلع 🤩😍
 للحم المفروم اللي على الوجه : 
بمقلاة ع نار متوسطة بضيف زيت نباتي ٣ ملاعق كبيرة
و بس يسخن بضيف حبة بصلة متوسطة الحجم مقسمة مكعبات ناعمة بقلبهم سوى لحتى يدبل البصل
بعدين بضيف نص كيلو لحم مفروم خشن وبقلبهم سوى وبضيف عليها ربع م.ص قرفة مطحونة /نص م.ص بهارات مشكلة /ملح وفلفل اسود حسب الرغبة بقلبهم لحتى يتغير لون اللحمة
وقبل ما تنشف مي اللحم بضيف كيس خضار مشكلة من الجزر والبازيلاء يعني ٤٠٠ غرام وبقلبهم وبخليهم ثلث ساعه لحتى يستوي الجزر والبازيلا
لتحمير الدجاج:
بعد سلقه بخلط هاي المكونات سوى: كوب لبن/١م.ك كاتشاب /١م.ك معجون طماطم /ربع م.ص هيل مطحون /نص م.ص بهارات مشكلة /٣م.ك زيت زيتون /ملح وفلفل اسود حسب الرغبة /رشة شطه مجروشة او اكتر حسب ازا بتحبو الحار او لا
بعدين بغطي فيهم الدجاج المسلوق وبحط الدجاج بصينية وبخلي فراغ بالنص للفحم
بجيب قطعة قصدير بشكلها ع شكل صحن بحط فيها حبتين فحم وبجيب شوية زيت مازولا وبحط ع الفحم
ببلش يعطي دخنة بتججنن مع ريحة خورافية
بكون طبعا مجمرة الفحم ع النار بالاول وبكون مجهزة قصدير اغطي في الصينية بسرعة قبل ما تروح دخنة الفحم
حطيت الفحم بالقصديرة وحطيت الزيت بلشت الدخنة تطلع بسكر عليهم بالقصدير
وبشكل ٣ ثقوب بالقصدير وبحط الصينية بالفرن ع الرف الوسط ثلث ساعة بكون مشغلة النار من تحت طبعا
بعدين بشيل القصدير وبحمر الدجاج من فوق
ريحتو خييااااال 😍والطعم ولا اروع 🥰