وصفة رقائق السمبوسك شغل بيتي

   
بنخلط الملح و الطحين جيدا وبنبلش نزيد المي شوي شوي لحتى نحصل على عجينة متماسكة وغير طرية ،
نتركها ترتاح نص ساعة رغم انه ما فيها خميرة .
بنقطع العجينة ل ١٢ كرة صغيرة وبنغطيها ترتاح عشرة دقائق .
بنقسم الكرات لثلاث اقسام كل قسم يتكون من ٤ كرات .
بنرق كل كرة لوحدها على شكل ارغفة وكل رغيف بندهنه زيت وبنرشه طحين وبنحطهم فوق بعض يعني كل اربع قطع فوق بعض .
برق الاربع ارغفه فوق بعض لاحصل على رغيف كبير ورقيق هيك بعمل بالاقسام الباقية .
بحط صاجة على راس الغاز او صينية وبحط الرغيف الكبير فوق الصاجة ،وهون مابدنا اياها تنخبز او تستوي ،بدنا اياها تنشف بس وبنقلبها ع الوجه الثاني ثواني وبنشيلها ،وبنعمل نفس الشي بالقسمين اللي ضلوا ،
بنقص حواف العجينة وبنعملها بشكل مستطيل وبنقطع كل مستطيل لثلاث اقسام وبنبلش نفتح العجين عن بعضه ورح يقبع بسهولة وكل شريحة عجين مقسومة رح تطلع معي اربع شرايح .يعني كل قسم رح يطلعلي ١٢ شريحة عجين وعندي ثلاث اقسام يعني رح يطلع عندي ٣٦ شريحة سمبوسك
وطبعا بتحشيهم شو ما بدك بنفس طريقة عجينة السمبوسك الجاهزة .
طبعا الحواف اللي شلناها ما بنكبها بنحتفظ فيها بالفريزر ورح نحتاجها للقلي لحراق اصبعه او فتة باذنجان او لشوربة العدس بدل الخبز المقلي
وسلامة تسلمكم.الطريقة سهلة وممتعة ما فيها غلبة ابدا وبتمنى تعجبكم