وصفة القرع العسلي

   
بنقطع القرعة متل تقطيع البطيخة وبعدين بنقشر كل حز لوحدة وبنقطعهم مكعبات
بنحط ٣ لتر ماء في وعاء وبنذوب فيهم ٣ معالق كبيرة ومعرمة  كلس وبنتركهم ساعتين .بعد الساعتين رح تلاحظي انه الكلس ترسب في قاع الوعاء وضلت المي الصافية ورح تلاحظي طبقة رقيقة زي الجلاتين على وجه المي بتحاولي تشيليها بالمغرفة بدون ما تحركي المي حتى ما يطلع الكلس لفوق .
وبنفس المغرفة بتشيلي المي الصافية وبتحطيها بطنجرة وبتحطي فوقهم قطع القرع وبتحاولي تخليهم ينغمرو بالمي منيح وبنتركهم ٢٤ ساعة
بعد ال ٢٤ ساعة بشيل المي تبع الكلس وبنغسل قطع القرع حوالي ٦ مرات حتى نتاكد انه نضف تماما من المي تبع الكلس ..
هلا بنحط القرع بالطنجرة وبنحط فوقه كمية السكر وبنحط مي غمرتهم وبنتركهم لحتى يغلو وبنهدي النار وبنتركهم مكشوفين
وكل عشر دقايق بنقلبهم وبنضيف معلقة ملح الليمون او عصير حبة ليمون وبنتركهم ٣ ساعات على نار هادية مع التقليب كل عشر دقايق لحتى يصيروا شفافين مثل الزجاج
بنصفي القرع حتى ينزل العسل تبعه وبنعبيه بمرطبان زجاج وهو سخن قبل ما يبرد لحتى ما يتسكر .
وبنعبي العسل تبعه بقنينه وبنستعمله للمهلبية او لكريم الكراميل ..وطعمه خرافي وفيكي تحتفظي بقطع القرع مع العسل ..حسب الرغبة
وصحة وهنا