(المقادير) المكونات
- ٢ كيلو لبنة جامدة او علبتين لبن نعاج
- ملح حسب الذوق
- زيت زيتون
الطريقة
طريقة عمل اللبنة المدعبلة سهلة جدا
- اما تشتروا لبنة طرية وتملحوها وتحطوها بقطعة قماش تتصفى لحتى تجمد
- او تشتروا لبن نعاج وهو افضل لبن لعمل اللبنة ونتوفر دائما بمحلات البان الشامي بالاردن
- بتجيبي اللبن وبتملحي شوية بحيث يكون ملحه عادي جدا زي اي طبخة بتملحيها .وبتحطيهم بقطعة قماش بمصفاية وبتحطي تحت المصفاية وعاء حتى تنزل المي كلها .
- بس يجف اللبن ويصير لبنة وتقدري تتحكمي فيها وتدعبيليها .بتجيبي صينية وبتحطي عليها قطعة قماش ابيض ..وركزوا على الابيض لانه القماش الملون رح يحل ع اللبنة وبتدعبلي حبات اللبنة وبتصفيهم بالصينية فوق القماش بحيث ما تلمس الحبات بعض يعني باعدي شوي بين الحبات ،وغطيهم بقماش ابيض وارفعيهم بمكان مرتفع بعيد عن الاطفال والايادي واتركيهم 24ساعة ،
- بعدها بتلاقيهم جفوا وبتمسكي الحبة بكل اريحية وبتجيبي مرطبان بتحطي في زيت زيتون للربع وبتبلشي تسقطي حبات اللبنة وبس يرتفعو حبات اللبنة عن الزيت بتزيدي الزيت شوية شوية شوية لحتى يتعبى المرطبان والزيت يغمر حبات اللبنة والا بتنتزع اللبنة
وصحة وهنا
وبما اننا بموضوع اللبن واللبنة انا عملت مرطبان مش من لبن النعاج وممكن تعمليه بلبن بقري ما في مشكلة .
بتجيبي مرطبان بتحطي فيه لبن وبتملحيه تمليح عادي زي اي طبخة وبتحطي فلفل اخضر مقطع حسب الرغبة طبعا وبتحطي كم حبة حلبة وبتحركيهم وبتغطيهم وبتتركيهم برا الثلاجة وبتحطي صحن تحت المرطبان لانه رح يفور خصوصا بالصيف ،اما في البرد ما بفور ،وبعد اسبوع او اقل رح يمشش اللبن ويصير طعمته طيبة بتحطي منه بصحن وبتحطي عليه زيت زيتون او بتفرمي حبة بندورة فيه وكلي وادعيلي
وصحة والف عافية
#لبنة مدعبلة ومش ..ام نضال
