(المقادير) المكونات
- للمفتول:
- كاسة برغل ناعم منقوع
- ٢ كيلو طحين قمح
- ملح ومي للفتل
- للدجاج:
- دجاجتين مقطعة
- راس بصل شرايح
- معلقة زيت ذرة
- ملح وفلفل اسود وزنجبيل مطحون
- لليخنة:
- ٦حبات بندورة حمرة
- ٦ حبات بصل مقطع شرايح
- كوبين حمص حب مسلوق
- ملح بهارات كمون
- فنجان زيت زيتون
الطريقة
- اولا بتنقعي برغل مقدار كاسة شاي او فنجان قهوة لحتى تبدي عليهم .
- بتحطي البرغل بعد ما نقعتيه بجاط عميق وبتشغلي الخفاقة
- وبتبلشي ترشي شوية طحين قمح وشوية مي فيها ملح وتخفقي بالخفاقة وكل ما حسيتي الكمية كبرت ،بتنخليهم بمصفاية حتى ينزل المفتول الناعم ويبقى الخشن ..
- بتردي ترجعي الناعم اللي نخلتيه ع الجاط وبتردي تخفقي وتزيدي مرة مي ومرة طحين لحتى تخلصي كل كمية الطحين ،،
- وطبعا ما رح يطلع كباتيل معك الا اول مرة ورح يصير يركض معك الطحين ركض ..
- وطبعا انا بحطهم باللجن وبفتلهم على ايدي شوية حتى تشد حبة المفتول وتوخذ الشكل الكروي متل الخرز ،
- وبنخله بمصفاية فتحاتها واسعة شوية لحتى ينزل كل الناعم ..
هلا نيجي للتهبيل:
- بنجيب طنجرة المفتول بنحط فيها مي للنص فقط وبنضيف ملح وكمون وشرحات ليمون حتى ما تسود الطنجرة ،
- بس تغلي المي بنحط المصفاية تبع طنجرة المفتول فوق الطنجرة وبندهنها زيت كما هو موضح بالصور وبنحط المفتول فيها وبنفرده منيح بحيث يكون بنفس المستوى .
- بعد ساعة تقريبا بنشيل المفتول وبنحطه بلجن كبير وبنفرده بشوكة كبيرة وبنرشرش عليه كاسة مي وبنحركة بالشوكة
- وبنرد نزيد المي اللي بالطنجرة وندهن المصفاية زيت وبنفرد نص كمية المفتول وبنفرد فوقهم كمية المفتول اللي هي عبارة عن راسين بصل مفروم وبنفركهم بملح وكمون وفلفل اسود وبهارات مشكلة .
- وبعدها بنفرد بقية المفتول وبنتركهم كمان ساعة ع تهبيل البخار حتى يستووا منيح وبنشيلهم بعد ساعة ونفردهم باللجن ونرشرشهم زيت زيتون .
اليخنة تبع المفتول معروفة:
- عبارة عن بصل شرايح بنقلبه بزيت زيتون لحتى يذبل
- وبنضيفله البندورة المقشرة والمقطعة
- وبنضيف حمص حب مسلوق وملح وكمون وفلفل اسود وبهارات .
- وطبعا بتضيفي معلقة معجون الطماطم
وصحة وهنا
#مفتول ام نضال بالخفاقة الكهربائية